“నా భూమి నాదేనా?” అనే ప్రశ్న ఇప్పుడు ఆంధ్రప్రదేశ్లో లక్షలాది మంది రైతులు, పేదలు, భూ యజమానుల నోట వినిపిస్తోంది. ఒకప్పుడు భూ హక్కులు కల్పించి పేదలను పట్టాదారులుగా నిలబెట్టిన వ్యవస్థను ప్రస్తుత కూటమి ప్రభుత్వం నిర్వీర్యం చేసిందనే విమర్శలు తీవ్రంగా వినిపిస్తున్నాయి. 22ఏ నిషేధిత జాబితా పేరుతో లక్షల ఎకరాల భూములను బందీ చేసి, రైతులను మళ్లీ కార్యాలయాల చుట్టూ తిప్పుతోందని బాధితులు ఆవేదన వ్యక్తం చేస్తున్నారు. అధికార పార్టీ నేతల జోక్యం, పెరిగిన భూ వివాదాలు, నిలిచిపోయిన రిజిస్ట్రేషన్లు రాష్ట్రంలో భూ వ్యవస్థను అస్తవ్యస్తంగా మార్చాయని ఆరోపణలు వెల్లువెత్తుతున్నాయి.
భూ వ్యవస్థ అస్తవ్యస్తం
22ఏ కత్తితో 20 లక్షల ఎకరాల భూములకు తాళం
కూటమి ప్రభుత్వం అధికారంలోకి వచ్చిన తర్వాత ఏకంగా 20 లక్షల ఎకరాలకు పైగా భూములను 22ఏ నిషేధిత జాబితాలో చేర్చిందనే ఆరోపణలు ఉన్నాయి. ఇందులో 13.59 లక్షల ఎకరాల ఫ్రీహోల్డ్ భూములు, 2.06 లక్షల ఎకరాల చుక్కల భూములు, 1.39 లక్షల ఎకరాల సర్వీస్ ఇనాం భూములు, వేలాది ఎకరాల పట్టా, అనాదీనం భూములు ఉన్నాయి.
జగన్ ప్రభుత్వం హయాంలో విముక్తి పొందిన భూములను కూడా తిరిగి 22ఏ జాబితాలో చేర్చడం వెనుక రాజకీయ కక్షే కారణమని వైఎస్సార్సీపీ విమర్శిస్తోంది. ఫలితంగా భూమి ఉన్నా రైతు అమ్ముకోలేని, రిజిస్ట్రేషన్ చేయలేని పరిస్థితి నెలకొంది.
భూ వ్యవస్థ అస్తవ్యస్తం
పేదలకు ఇచ్చిన ఫ్రీహోల్డ్ హక్కులపై చంద్రబాబు పగ?
20 ఏళ్లకు పైగా అసైన్డ్ భూములు సాగు చేస్తున్న పేదలకు జగన్ ప్రభుత్వం చారిత్రాత్మక నిర్ణయం తీసుకుని ఫ్రీహోల్డ్ హక్కులు కల్పించింది. దీంతో ఎస్సీ, ఎస్టీ, బీసీ, మైనారిటీ వర్గాలకు చెందిన లక్షలాది కుటుంబాలు తొలిసారిగా పూర్తి స్థాయి యాజమాన్య హక్కులు పొందాయి.
కానీ ప్రభుత్వం మారిన వెంటనే ఫ్రీహోల్డ్ భూములపై అక్రమాల ముద్ర వేసి వాటిని మళ్లీ 22ఏ జాబితాలో చేర్చడం పేదలపై దాడిగా విమర్శలు వస్తున్నాయి. రెండేళ్లు గడిచినా ఆరోపణలు నిరూపించలేకపోయిన ప్రభుత్వం, భూములపై హక్కులు మాత్రం పునరుద్ధరించకపోవడం ప్రశ్నలు లేవనెత్తుతోంది.
భూ వ్యవస్థ అస్తవ్యస్తం
ప్రచారం ఒకటి.. భూముల వాస్తవ పరిస్థితి మరోటి
22ఏ జాబితా నుంచి భూములను తొలగిస్తున్నామని ప్రభుత్వం భారీగా ప్రచారం చేస్తోంది. కానీ క్షేత్రస్థాయిలో మాత్రం రైతుల కష్టాలు అలాగే కొనసాగుతున్నాయి. రిజిస్ట్రేషన్లు నిలిచిపోవడం, భూ రికార్డుల సమస్యలు, అధికారుల నిర్లక్ష్యం కారణంగా ప్రజలు తీవ్ర ఇబ్బందులు పడుతున్నారు.
ప్రతి సోమవారం కలెక్టరేట్ల వద్ద భూ సమస్యల పరిష్కారం కోసం బాధితులు బారులు తీరడం పరిస్థితి ఎంత దారుణంగా ఉందో చెప్పకనే చెబుతోంది.
భూ వ్యవస్థ అస్తవ్యస్తం
జగన్ భూ సంస్కరణలకు బ్రేక్.. రీ-సర్వేపై రాజకీయాలు
జగన్ ప్రభుత్వం 2019 నుంచి దేశంలోనే తొలిసారిగా సమగ్ర భూ రీ-సర్వే కార్యక్రమాన్ని ప్రారంభించింది. శాటిలైట్, డ్రోన్, జీపీఎస్ సాంకేతికతతో గ్రామాల వారీగా సర్వే నిర్వహించి భూ రికార్డులను ఆధునికీకరించింది.
ఈ కార్యక్రమంతో భూ కబ్జాలు, నకిలీ పత్రాలు, రికార్డుల ట్యాంపరింగ్కు చెక్ పడుతుందని భావించారు. కానీ కూటమి ప్రభుత్వం అధికారంలోకి వచ్చిన తర్వాత ఈ కార్యక్రమంపై విమర్శలు చేస్తూ కొంతకాలం నిలిపివేసింది. తర్వాత మళ్లీ కొనసాగిస్తూ ఇప్పుడు అదే కార్యక్రమాన్ని తమ విజయంగా ప్రచారం చేసుకుంటోందని ప్రతిపక్షం ఆరోపిస్తోంది.
జగన్ కృషికి కేంద్రం నుంచి రూ.500 కోట్ల ప్రోత్సాహకం
భూ రికార్డుల డిజిటలీకరణలో ఆంధ్రప్రదేశ్ దేశంలోనే అగ్రస్థానంలో నిలిచిందని కేంద్ర గ్రామీణాభివృద్ధి శాఖ నివేదిక గుర్తించింది. ఈ పనితీరుకు రాష్ట్రానికి ప్లాటినం గ్రేడింగ్తో పాటు రూ.500 కోట్ల ప్రోత్సాహకాలు కూడా లభించాయి.
వైఎస్ జగన్ ప్రభుత్వం చేపట్టిన భూ సంస్కరణల ఫలితంగానే ఈ గుర్తింపు వచ్చిందని వైఎస్సార్సీపీ చెబుతోంది. అయితే ఆ కార్యక్రమాల వల్ల వచ్చిన ప్రోత్సాహకాలను ప్రస్తుతం కూటమి ప్రభుత్వం అనుభవిస్తూనే, అదే సంస్కరణలను నిర్వీర్యం చేసిందనే విమర్శలు వినిపిస్తున్నాయి.
భూ వ్యవస్థ అస్తవ్యస్తం
భూమి బందీ.. హక్కులు ప్రశ్నార్థకం.. సమాధానం చెప్పాల్సింది ఎవరు?
భూమి అనేది రైతుకు కేవలం ఆస్తి కాదు.. జీవనాధారం. అలాంటి భూములనే 22ఏ జాబితా పేరుతో బందీ చేసి, పేదలకు ఇచ్చిన హక్కులను ప్రశ్నార్థకంగా మార్చడం రాష్ట్రంలో తీవ్ర చర్చకు దారితీస్తోంది. ఒకవైపు భూముల విముక్తి పేరుతో ప్రచారం.. మరోవైపు లక్షల ఎకరాలపై ఆంక్షలు. ఈ విరుద్ధ పరిస్థితుల్లో “నా భూమి నాదేనా?” అనే ప్రశ్నకు సమాధానం చెప్పాల్సిన బాధ్యత ఇప్పుడు ప్రభుత్వంపైనే ఉంది. ప్రజలకు హక్కులు ఇవ్వాలా? లేక భూములను వివాదాల్లోనే ఉంచాలా? అన్నది రాష్ట్ర రాజకీయాల్లో కీలక అంశంగా మారింది.
భూ వ్యవస్థ అస్తవ్యస్తం
