ఒకప్పుడు ప్రభుత్వ రంగ సంస్థలను కాపాడతామని చెప్పిన చంద్రబాబు ప్రభుత్వం ఇప్పుడు ఏపీఎస్ఆర్టీసీ ఆస్తులనే ప్రైవేటు సంస్థల చేతుల్లోకి నెట్టేందుకు అడుగులు వేస్తోందా? ఇప్పటికే ఈ-బస్సుల పేరుతో వేల కోట్ల రూపాయల విలువైన ఆస్తులను కార్పొరేట్ సంస్థలకు అప్పగించిందన్న విమర్శలు ఎదుర్కొంటున్న కూటమి ప్రభుత్వం, ఇప్పుడు రాష్ట్రంలోని అత్యంత విలువైన ఆర్టీసీ బస్ స్టేషన్ల భూములపై దృష్టి పెట్టినట్లు ఆరోపణలు వినిపిస్తున్నాయి. ప్రజల ఆస్తులను అభివృద్ధి పేరుతో ప్రైవేటుకు కట్టబెట్టే ప్రయత్నమా? అనే ప్రశ్నలు తలెత్తుతున్నాయి.
RTC PPP పిడుగు
ఆర్టీసీని నిర్వీర్యం చేసే రెండో అంకమా?
ఏపీఎస్ఆర్టీసీ రాష్ట్రంలో దాదాపు 50 వేల మంది ఉద్యోగులకు ఉపాధి కల్పిస్తున్న అతిపెద్ద ప్రజా రంగ సంస్థ. కానీ గత కొంతకాలంగా సంస్థకు చెందిన ఆస్తులపై ప్రభుత్వం తీసుకుంటున్న నిర్ణయాలు అనుమానాలకు తావిస్తున్నాయి.
ఇప్పటికే ఈ-బస్సుల విధానం ముసుగులో సుమారు రూ.6,600 కోట్ల విలువైన 12 ఆర్టీసీ డిపోల భూములను ప్రైవేటు సంస్థలకు అప్పగించే ప్రక్రియ ప్రారంభమైందన్న విమర్శలు ఉన్నాయి. ఇప్పుడు అదే తరహాలో ప్రధాన బస్ స్టేషన్ల భూములను కూడా పీపీపీ పేరుతో కార్పొరేట్ కంపెనీలకు అందించే ప్రయత్నాలు జరుగుతున్నాయని ఉద్యోగ సంఘాలు ఆరోపిస్తున్నాయి.
RTC PPP పిడుగు
రూ.2,400 కోట్ల భూమిని రూ.500 కోట్ల పెట్టుబడికి?
ఈ వ్యవహారంలో అత్యంత వివాదాస్పద అంశం విశాఖపట్నంలోని మద్దిలపాలెం బస్ స్టేషన్.
సుమారు 12 ఎకరాల విస్తీర్ణంలో ఉన్న ఈ భూమి మార్కెట్ విలువ దాదాపు రూ.2,400 కోట్ల వరకు ఉంటుందని అంచనా. అయితే కేవలం రూ.500 కోట్ల పెట్టుబడి పెట్టే ప్రైవేటు సంస్థకు అభివృద్ధి హక్కులు ఇవ్వడానికి డీపీఆర్ సిద్ధం చేస్తున్నారనే సమాచారం తీవ్ర చర్చకు దారితీసింది.
అంతేకాదు, 99 ఏళ్ల లీజు ప్రతిపాదన కూడా పరిశీలనలో ఉందని ప్రచారం జరుగుతోంది. 99 ఏళ్ల లీజు అంటే పేరు మాత్రమే లీజు.. వాస్తవానికి శాశ్వతంగా ప్రజా ఆస్తులను ప్రైవేటు చేతుల్లో పెట్టడమేనని విమర్శకులు మండిపడుతున్నారు.
RTC PPP పిడుగు
విశాఖతో మొదలు.. రాష్ట్రవ్యాప్తంగా అదే ప్లానా?
ఈ ప్రణాళిక ఒక్క విశాఖకే పరిమితం కాదని తెలుస్తోంది. తిరుపతి, విజయవాడ ఆటోనగర్, గుంటూరు బస్ స్టేషన్లను కూడా ఇదే విధానంలో ప్రైవేటు భాగస్వామ్యానికి అప్పగించేందుకు ప్రభుత్వం కసరత్తు చేస్తున్నట్లు సమాచారం.
అదే సమయంలో కర్నూలు, అనంతపురం, కడప, ఒంగోలు, రాజమహేంద్రవరం, ఏలూరు బస్ స్టేషన్లను కూడా గుర్తించినట్లు తెలుస్తోంది. ఈ నగరాల్లోని ఆర్టీసీ భూములు నగర మధ్యలో ఉండటంతో వాటి మార్కెట్ విలువ వేల కోట్ల రూపాయలకు చేరుకుంటుందని నిపుణులు చెబుతున్నారు.
RTC PPP పిడుగు
అభివృద్ధి పేరుతో ఆస్తుల బదిలీనా?
పీపీపీ మోడల్ ద్వారా ఆధునిక బస్ స్టేషన్లు నిర్మిస్తామని ప్రభుత్వం చెబుతున్నా, అసలు లాభం ఎవరికి అన్న ప్రశ్నలు వినిపిస్తున్నాయి.
ప్రజల డబ్బుతో దశాబ్దాలుగా కూడబెట్టిన ఆస్తులను ప్రైవేటు సంస్థలకు అప్పగించి, తర్వాత వాటిపై వాణిజ్య సముదాయాలు నిర్మించే అవకాశం కల్పిస్తే ఆర్టీసీకి కలిగే ప్రయోజనం ఎంత? కార్పొరేట్ సంస్థలకు దక్కే లాభం ఎంత? అనే అంశాలపై స్పష్టత లేదని విమర్శలు వస్తున్నాయి.
RTC PPP పిడుగు
రగిలిపోతున్న ఉద్యోగ సంఘాలు
ప్రభుత్వ నిర్ణయాలపై ఆర్టీసీ ఉద్యోగ సంఘాలు తీవ్ర ఆగ్రహం వ్యక్తం చేస్తున్నాయి. సంస్థకు చెందిన స్థిరాస్తులను ఒక్కొక్కటిగా ప్రైవేటు చేతుల్లోకి నెట్టడం ద్వారా ఆర్టీసీ భవిష్యత్తును ప్రమాదంలో పడేస్తున్నారని ఆరోపిస్తున్నాయి.
ఇప్పటికే ఆర్థిక ఒత్తిడిలో ఉన్న సంస్థను బలోపేతం చేయాల్సింది పోయి, దాని బలమైన ఆస్తులనే కోల్పోయే పరిస్థితి తీసుకురావడం వెనుక అసలు ఉద్దేశం ఏమిటని ఉద్యోగ సంఘాలు ప్రశ్నిస్తున్నాయి.
RTC PPP పిడుగు
ప్రజా ఆస్తుల పరిరక్షణా? ప్రైవేటీకరణకు పరాకాష్టా?
ప్రజల ఆస్తులు, ప్రభుత్వ భూములు, వేల కోట్ల విలువైన ఆర్టీసీ స్థలాలు… ఇవన్నీ అభివృద్ధి పేరుతో ప్రైవేటు సంస్థలకు అప్పగించే దిశగా అడుగులు పడుతున్నాయన్న ఆరోపణలు ఇప్పుడు రాష్ట్ర రాజకీయాల్లో హాట్ టాపిక్గా మారాయి. విశాఖ మద్దిలపాలెం నుంచి విజయవాడ, తిరుపతి వరకు విస్తరించిన ఈ ప్రణాళిక నిజంగా అభివృద్ధికోసమా? లేక ప్రజా సంపదను కార్పొరేట్ చేతుల్లో పెట్టే భారీ కుట్రా? అన్న ప్రశ్నలకు ప్రభుత్వం సమాధానం చెప్పాల్సిన పరిస్థితి నెలకొంది.
RTC PPP పిడుగు
