దళిత మహిళ గంగమ్మ లాకప్ డెత్ కేసులో సంచలన మలుపు.. ప్రత్యక్ష సాక్షి వాంగ్మూలానికి హైకోర్టు అత్యవసర ఆదేశాలు
మొన్న సాయి కృష్ణ… నిన్న క్రాంతి కుమార్… నేడు గంగమ్మ..!
ఇలా వరుసగా వెలుగులోకి వస్తున్న లాకప్ డెత్ ఘటనలు రాష్ట్రంలో తీవ్ర కలకలం రేపుతున్నాయి. గంగమ్మ మృతిని సహజ మరణంగా చిత్రీకరించే ప్రయత్నాలు జరుగుతున్నాయనే ఆరోపణల మధ్య, ఈ కేసులో కీలక ప్రత్యక్ష సాక్షి బేగరి దుర్గప్ప ప్రాణాపాయ స్థితిలో ఉండటం మరిన్ని అనుమానాలకు తావిస్తోంది. ఈ నేపథ్యంలో దుర్గప్ప వాంగ్మూలాన్ని వెంటనే నమోదు చేయాలని హైకోర్టు ఇచ్చిన ఆదేశాలు కేసును రాజకీయంగా, న్యాయపరంగా కొత్త దిశలోకి తీసుకెళ్లాయి.
గంగమ్మ లాకప్ డెత్
గంగమ్మ లాకప్ డెత్పై పెరుగుతున్న అనుమానాలు
కుమారుడి అదృశ్యం కేసు విచారణ పేరుతో గంగమ్మను సిట్ పోలీసులు అదుపులోకి తీసుకున్నారని, అనంతరం ఆమె లాకప్లోనే ప్రాణాలు కోల్పోయిందని కుటుంబ సభ్యులు, హక్కుల సంఘాలు ఆరోపిస్తున్నాయి. ఇది సాధారణ మరణం కాదని, లాకప్లో జరిగిన హింసకు సంబంధించిన కేసుగా విచారణ జరగాలని డిమాండ్లు పెరుగుతున్నాయి.
గంగమ్మతో పాటు అదుపులో ఉన్న బేగరి దుర్గప్పను కూడా తీవ్రంగా చిత్రహింసలకు గురి చేశారని హైకోర్టు దృష్టికి తీసుకెళ్లారు. ప్రస్తుతం దుర్గప్ప పరిస్థితి విషమంగా ఉండటంతో, అతని వాంగ్మూలం ఈ కేసులో అత్యంత కీలకంగా మారింది.
గంగమ్మ లాకప్ డెత్
“ఆలస్యం చేయొద్దు”.. మేజిస్ట్రేట్కు హైకోర్టు స్పష్టమైన ఆదేశాలు
దుర్గప్ప ఆరోగ్య పరిస్థితి అత్యంత ఆందోళనకరంగా ఉందని, అతని వాంగ్మూలం నమోదు కాకముందే ఏదైనా జరిగితే కీలక ఆధారాలు శాశ్వతంగా కోల్పోయే ప్రమాదం ఉందని పిటిషనర్ తరఫు న్యాయవాదులు కోర్టుకు వివరించారు.
దీనిపై స్పందించిన హైకోర్టు ధర్మాసనం, మేజిస్ట్రేట్ స్వయంగా ఆసుపత్రికి వెళ్లి దుర్గప్ప వాంగ్మూలాన్ని నమోదు చేయాలని ఆదేశించింది. నమోదు చేసిన వాంగ్మూల నివేదికను ఈ నెల 23న కోర్టు ముందుంచాలని కూడా స్పష్టం చేసింది.
వరుస లాకప్ డెత్లపై రాజకీయ దుమారం
ఇటీవలి కాలంలో వరుసగా వెలుగులోకి వస్తున్న లాకప్ డెత్ ఘటనలు రాష్ట్రంలో చర్చనీయాంశంగా మారాయి. ప్రతి ఘటన తర్వాత ప్రశ్నలు లేవనెత్తినా, నిజాలు మాత్రం లాకప్ గోడల మధ్యే సమాధి అవుతున్నాయనే విమర్శలు వినిపిస్తున్నాయి.
గంగమ్మ కేసులో మాత్రం పరిస్థితి భిన్నంగా కనిపిస్తోంది. ఎందుకంటే ఈసారి ప్రత్యక్ష సాక్షి ఉన్నాడు. అతను కూడా ప్రాణాపాయ స్థితిలో ఉన్నాడు. అతని వాంగ్మూలం బయటకు వస్తే, గంగమ్మ మృతి వెనుక ఉన్న నిజాలు మాత్రమే కాదు, లాకప్లో జరిగిన వ్యవహారాలపై కూడా సంచలన విషయాలు వెలుగులోకి వచ్చే అవకాశం ఉందనే చర్చ సాగుతోంది.
గంగమ్మ లాకప్ డెత్
గంగమ్మ మృతి వెనుక నిజం బయటపడుతుందా?.. దుర్గప్ప వాంగ్మూలమే ఇప్పుడు ‘డెత్ నోట్’గా మారనుందా?
గంగమ్మ మృతి కేసు ఇప్పుడు కేవలం ఒక కుటుంబానికి సంబంధించిన విషాదం కాదు. ఇది లాకప్లలో జరిగే అనుమానాస్పద మరణాలు, అధికార వ్యవస్థపై లేవుతున్న ప్రశ్నలు, బాధితులకు న్యాయం జరుగుతుందా అనే పెద్ద చర్చకు కేంద్రబిందువుగా మారింది. ఇప్పుడు అందరి చూపు ఒక్కటే… ఆసుపత్రి మంచంపై ఉన్న బేగరి దుర్గప్ప వాంగ్మూలంపైనే.
గంగమ్మ లాకప్ డెత్
