ఇప్పటం గ్రామం… ఒకప్పుడు రాష్ట్ర రాజకీయాలను కుదిపేసిన పేరు. జనసేన సభకు స్థలం ఇచ్చిన వారిపై ప్రభుత్వం కక్ష సాధింపు చర్యలకు దిగిందని, కాపుల ఇళ్లను టార్గెట్ చేసి కూల్చేస్తున్నారని జనసేన అధినేత పవన్ కళ్యాణ్ తీవ్ర ఆరోపణలు చేశారు. కారుపై కూర్చొని నిరసన తెలుపుతూ, కాపు సమాజంపై అన్యాయం జరుగుతోందంటూ భావోద్వేగ ప్రసంగాలు చేశారు.
అయితే ప్రశ్న మాత్రం ఇప్పటికీ అలాగే ఉంది. నిజంగానే కాపుల ఇళ్లను కూల్చారా? లేక ప్రభుత్వ భూముల ఆక్రమణలను తొలగించే సాధారణ పరిపాలనా చర్యను రాజకీయ అజెండాగా మార్చి కాపు సమాజాన్ని రెచ్చగొట్టే ప్రయత్నం జరిగిందా?
ఇప్పటం నిజం ఏమిటి
ఇప్పటంలో అసలు జరిగినది ఏమిటి?
మంగళగిరి-తాడేపల్లి నగర కార్పొరేషన్ పరిధిలోని ఇప్పటం గ్రామంలో ప్రభుత్వ రహదారిని ఆక్రమించి కొందరు నిర్మాణాలు చేపట్టినట్లు అధికారులు గుర్తించారు. రోడ్డు విస్తరణలో భాగంగా 2022లో రూ.1.65 కోట్లతో పనులు చేపట్టాలని నిర్ణయించారు.
ఈ క్రమంలో సంబంధిత వారికి ముందుగానే నోటీసులు జారీ చేసి, నవంబర్ 4, 2022న ఆక్రమణలను తొలగించే చర్యలు చేపట్టారు.
కూల్చింది ఇళ్లా? లేక ప్రహరీలా?
ఈ వ్యవహారంలో పెద్ద ఎత్తున ప్రచారం జరిగిన విషయం ఏమిటంటే.. “కాపుల ఇళ్లను కూల్చేశారు” అన్నది. కానీ అధికారిక రికార్డులు మరో విషయాన్ని చెబుతున్నాయి.
అధికారుల ప్రకారం:
- ఒక్క ఇంటినీ పూర్తిగా కూల్చలేదు.
- ఆక్రమిత స్థలంలో ఉన్న ప్రహరీలు, మెట్లు, చిన్నచిన్న దుకాణాలను మాత్రమే తొలగించారు.
- మానవతా దృక్పథంతో ఇళ్ల ప్రధాన నిర్మాణాలను తాకకుండా చర్యలు తీసుకున్నారు.
అంటే “ఇళ్ల విధ్వంసం”గా ప్రచారం జరిగిన అంశం, వాస్తవానికి “ఆక్రమణల తొలగింపు” మాత్రమేనా అన్న ప్రశ్న ముందుకు వస్తోంది.
ఇప్పటం నిజం ఏమిటి
జనసేన సభకు స్థలం ఇచ్చిన వారినే టార్గెట్ చేశారా?
జనసేన సభకు స్థలం ఇచ్చిన వారందరినీ ప్రభుత్వం వేధించిందనే ఆరోపణ కూడా బలంగా వినిపించింది. కానీ అధికారిక వివరాల ప్రకారం సభకు స్థలం ఇచ్చిన వారిలో కేవలం ఒకరు మాత్రమే రోడ్డు విస్తరణ బాధితుడిగా గుర్తించబడ్డారు. అంతేకాదు, ఆయనకు కోర్టు నుంచి స్టే కూడా లభించింది.
దీంతో “జనసేనకు స్థలం ఇచ్చారని ఇళ్లను కూల్చేశారు” అనే ప్రచారం ఎంతవరకు వాస్తవానికి దగ్గరగా ఉందనే ప్రశ్నలు తలెత్తాయి.
ఇప్పటం నిజం ఏమిటి
కేవలం కాపులనే లక్ష్యంగా చేసుకున్నారా?
మొత్తం 53 ఆక్రమణలు గుర్తించగా, పంచాయతీ కార్యాలయాన్ని మినహాయిస్తే మిగిలిన 52 ఆక్రమణల్లో వివిధ సామాజిక వర్గాలకు చెందిన వ్యక్తులు ఉన్నట్లు అధికారిక గణాంకాలు చెబుతున్నాయి.
వాటిలో:
- కాపులు – 28 మంది
- రెడ్లు – 13 మంది
- బీసీలు – 12 మంది
అంటే చర్యలు కేవలం ఒకే సామాజిక వర్గంపైనే జరిగాయనే వాదనకు ఈ గణాంకాలు పూర్తిగా మద్దతు ఇవ్వడం లేదని రాజకీయ విశ్లేషకులు చెబుతున్నారు.
ఇప్పటం నిజం ఏమిటి
కోర్టుల్లో ఏమి తేలింది?
ఇళ్ల కూల్చివేతకు ముందు నోటీసులు ఇవ్వలేదంటూ 14 మంది కోర్టును ఆశ్రయించారు. అయితే నోటీసులు ఇచ్చినట్లు అధికారులు కోర్టుకు ఆధారాలు సమర్పించారు.
దీంతో:
- కోర్టును తప్పుదోవ పట్టించారని భావించిన హైకోర్టు 14 మంది పిటిషనర్లకు ఒక్కొక్కరికి రూ.1 లక్ష చొప్పున జరిమానా విధించింది.
- అనంతరం సుప్రీంకోర్టును ఆశ్రయించగా, హైకోర్టు తీర్పును సమర్థిస్తూ ఒక్కొక్కరు అదనంగా రూ.25 వేల కోర్టు ఖర్చులు చెల్లించాలని ఆదేశించింది.
ఇప్పటం నిజం ఏమిటి
ఇప్పటంలో కూలింది ప్రహరీలా… లేక కాపుల భావోద్వేగాలా?
ప్రహరీల కూల్చివేతను “కాపుల ఇళ్ల విధ్వంసం”గా చిత్రీకరించడం, ఆక్రమణల తొలగింపును “సామాజిక వర్గంపై దాడి”గా ప్రచారం చేయడం ద్వారా భావోద్వేగాలను రెచ్చగొట్టి రాజకీయ లబ్ధి పొందాలనే ప్రయత్నం జరిగిందా? అనే ప్రశ్న ఇప్పటికీ చర్చనీయాంశంగానే ఉంది. కోర్టుల పరిశీలనలు, అధికారిక గణాంకాలు, రికార్డులు ఒకవైపు ఉంటే.. రాజకీయ ఆరోపణలు మరోవైపు నిలిచాయి. ఈ నేపథ్యంలో ఇప్పటం ఘటనలో నిజంగా బాధితులు ఎవరు? రాజకీయంగా లబ్ధి పొందింది ఎవరు? అన్న ప్రశ్నలకు సమాధానం ప్రజలే వెతకాల్సి ఉంది.
ఇప్పటం నిజం ఏమిటి
