ఆంధ్రప్రదేశ్లో నిర్వహించిన మెగా డీఎస్సీ-2025 ఉపాధ్యాయ నియామక ప్రక్రియలో చోటుచేసుకున్నట్లు ఆరోపణలు ఎదుర్కొంటున్న అక్రమాలను జాతీయ స్థాయిలో ప్రస్తావిస్తూ వైఎస్సార్ కాంగ్రెస్ పార్టీ (వైసీపీ) పార్లమెంట్లో పోరాటానికి దిగింది.
వైసీపీ రాజ్యసభ సభ్యుడు, పార్లమెంటరీ పార్టీ నాయకుడు వై.వి. సుబ్బారెడ్డి రాజ్యసభలో రూల్-267 కింద నోటీసు ఇవ్వగా, తిరుపతి లోక్సభ సభ్యుడు మద్దిల గురుమూర్తి లోక్సభలో వాయిదా తీర్మానం (Adjournment Motion) సమర్పించారు.
16 వేలకుపైగా ఉపాధ్యాయ పోస్టుల భర్తీ కోసం నిర్వహించిన మెగా డీఎస్సీ-2025 నియామక ప్రక్రియలో జరిగిన అక్రమాల కారణంగా 3.5 లక్షలకుపైగా అభ్యర్థుల భవిష్యత్తు ప్రమాదంలో పడిందని, ఈ అంశాన్ని అత్యవసర ప్రజా ప్రాధాన్యత కలిగిన అంశంగా పరిగణించి పార్లమెంట్లో చర్చించాలని ఇద్దరు ఎంపీలు డిమాండ్ చేశారు.
మెగా డీఎస్సీ స్కామ్
రాజ్యసభలో రూల్-267 కింద వై.వి. సుబ్బారెడ్డి నోటీసు
రాజ్యసభకు సమర్పించిన నోటీసులో వై.వి. సుబ్బారెడ్డి కీలక అంశాలను ప్రస్తావించారు.
22.79 లక్షల మంది NEET అభ్యర్థులకు సంబంధించిన అంశాన్ని పార్లమెంట్లో చర్చించినట్లే, ఆంధ్రప్రదేశ్లో మెగా డీఎస్సీ-2025కు హాజరైన 3.5 లక్షల మంది అభ్యర్థుల భవిష్యత్తుకు సంబంధించిన ఈ అంశం కూడా అంతే అత్యవసరమైనదని ఆయన పేర్కొన్నారు.
నిరుద్యోగ యువత భవిష్యత్తు, ప్రభుత్వ నియామక వ్యవస్థపై ప్రజల విశ్వాసం, రాజ్యాంగం కల్పించిన సమాన ఉద్యోగ అవకాశాల హక్కుకు ఈ వ్యవహారం సంబంధించినదని నోటీసులో వివరించారు.
రాజ్యసభలో చర్చ చేపట్టి కేంద్ర ప్రభుత్వం వెంటనే ఈ చర్యలు తీసుకోవాలని కోరారు.
- మెగా డీఎస్సీ నియామక ప్రక్రియలో జరిగిన ఆరోపణలపై స్వతంత్ర దర్యాప్తు చేపట్టాలి.
- అర్హులైన అభ్యర్థుల ప్రయోజనాలను రక్షించాలి.
- ప్రభుత్వ నియామక పరీక్షల్లో సమగ్ర పారదర్శకత, నిష్పక్షపాతాన్ని తీసుకువచ్చే సంస్కరణలు అమలు చేయాలి.
లోక్సభలో మద్దిల గురుమూర్తి సంచలన ఆరోపణలు
లోక్సభకు సమర్పించిన వాయిదా తీర్మానంలో ఎంపీ మద్దిల గురుమూర్తి మెగా డీఎస్సీ నియామకాలపై పలు తీవ్రమైన ఆరోపణలు చేశారు.
ఆయన పేర్కొన్న అంశాలు:
- 16 వేలకుపైగా ఉపాధ్యాయ పోస్టుల నియామక ప్రక్రియ తీవ్ర అక్రమాలతో సాగిందని ఆరోపించారు.
- పరీక్ష నిర్వహణలో ఉన్న భద్రతా వ్యవస్థను పూర్తిగా నిర్వీర్యం చేశారని పేర్కొన్నారు.
- ప్రశ్నాపత్రాల తయారీ నుంచి పరీక్ష నిర్వహణ వరకు మొత్తం బాధ్యతను ఒకే సంస్థకు అప్పగించడం వల్ల పారదర్శకత దెబ్బతిందన్నారు.
- అత్యంత గోప్యమైన పరీక్షా ప్రక్రియలో ఔట్సోర్సింగ్ సిబ్బందిని వినియోగించడం వల్ల ప్రక్రియ విశ్వసనీయతపై తీవ్ర అనుమానాలు వ్యక్తమయ్యాయని తెలిపారు.
- పరీక్షకు సంబంధించిన గోప్యమైన బాధ్యతలు నిర్వహించిన ఔట్సోర్సింగ్ ఉద్యోగి మొదటి ర్యాంకు సాధించడం అనేక అనుమానాలకు తావిచ్చిందన్నారు.
- అనంతరం అతని పేరు మెరిట్ జాబితా నుంచి తొలగించడం, సర్టిఫికెట్ వెరిఫికేషన్ నుంచి తప్పించడం, అతను కోర్టును ఆశ్రయించడం వల్ల ప్రశ్నాపత్రం లీక్, పరీక్షలో జోక్యం జరిగి ఉండొచ్చనే అనుమానాలు మరింత బలపడ్డాయని పేర్కొన్నారు.
- గత డీఎస్సీల మాదిరిగా జిల్లా వారీ మెరిట్ జాబితాలు, మెరిట్-కమ్-రోస్టర్ జాబితాలను విడుదల చేయలేదని విమర్శించారు.
- సర్టిఫికెట్ వెరిఫికేషన్ పూర్తి చేసిన అనేక మంది అభ్యర్థుల పేర్లు తుది ఎంపిక జాబితాలో లేకపోవడం ఎంపిక నిబంధనలపై సందేహాలు రేకెత్తిస్తోందన్నారు.
- మధ్యలోనే స్పోర్ట్స్ కోటా విధానంలో మార్పులు చేశారని ఆరోపించారు.
- డబ్బులు తీసుకుని ఉద్యోగాలు ఇచ్చారనే ఆరోపణలు ప్రజల్లో తీవ్ర అనుమానాలకు దారితీశాయని పేర్కొన్నారు.
మెగా డీఎస్సీ స్కామ్
కేంద్ర ప్రభుత్వానికి వైసీపీ ఎంపీల డిమాండ్లు
మెగా డీఎస్సీ వ్యవహారంపై కేంద్ర ప్రభుత్వం వెంటనే జోక్యం చేసుకుని ఈ చర్యలు తీసుకోవాలని ఎంపీలు కోరారు.
- సీబీఐ లేదా స్వతంత్ర సంస్థతో కాలపరిమితి ఉన్న విచారణ చేపట్టాలి.
- పూర్తి మెరిట్ జాబితా, మెరిట్-కమ్-రోస్టర్ జాబితాలను బహిర్గతం చేయాలి.
- డిజిటల్ ఆధారాలను భద్రపరచాలి.
- ప్రశ్నాపత్రం లీక్ ఆరోపణలపై విచారణ జరపాలి.
- స్పోర్ట్స్ కోటా అవకతవకలు, రిజర్వేషన్ ఉల్లంఘనలపై దర్యాప్తు చేయాలి.
- డబ్బులు తీసుకుని ఉద్యోగాలు ఇచ్చారనే ఆరోపణలపై కఠిన చర్యలు తీసుకోవాలి.
- బాధ్యులపై చట్టపరమైన చర్యలు చేపట్టాలి.
మెగా డీఎస్సీ స్కామ్
3.5 లక్షల మంది అభ్యర్థుల భవిష్యత్తు ప్రశ్నార్థకం?
మెగా డీఎస్సీ-2025లో పాల్గొన్న 3.5 లక్షలకుపైగా నిరుద్యోగ యువత భవిష్యత్తు ఈ నియామక ప్రక్రియతో ముడిపడి ఉందని వైసీపీ ఎంపీలు పేర్కొన్నారు. అందుకే ఈ అంశాన్ని అత్యవసర ప్రజా ప్రయోజన అంశంగా పరిగణించి పార్లమెంట్లో చర్చించి కేంద్ర ప్రభుత్వం తక్షణ చర్యలు తీసుకోవాలని విజ్ఞప్తి చేశారు.
మెగా డీఎస్సీ స్కామ్
మెగా డీఎస్సీ స్కామ్ను పార్లమెంట్ గడప దాటించిన వైసీపీ.. కేంద్రం స్పందిస్తుందా?
మెగా డీఎస్సీ-2025 నియామకాలపై అక్రమాల ఆరోపణలను దేశ అత్యున్నత ప్రజాస్వామ్య వేదిక అయిన పార్లమెంట్లో వైసీపీ అధికారికంగా లేవనెత్తడంతో ఈ వివాదం జాతీయ స్థాయికి చేరింది. లోక్సభ, రాజ్యసభలో వాయిదా తీర్మానాలు, రూల్-267 నోటీసుల ద్వారా సీబీఐ దర్యాప్తు, పూర్తి పారదర్శకత, బాధ్యులపై చర్యల కోసం వైసీపీ ఒత్తిడి పెంచుతోంది. ఇప్పుడు ఈ ఆరోపణలపై కేంద్ర ప్రభుత్వం, సంబంధిత సంస్థలు ఎలాంటి నిర్ణయం తీసుకుంటాయన్నది లక్షలాది డీఎస్సీ అభ్యర్థులు ఆసక్తిగా ఎదురుచూస్తున్నారు.
మెగా డీఎస్సీ స్కామ్
