చట్టాన్ని కాపాడేవారే సాక్ష్యాలను తుడిచేస్తే… ప్రజలు ఎవరిని నమ్మాలి?
ఒక ఏటీఎంలో దొంగతనం జరిగినా… ఒక బ్యాంకులో చోరీ జరిగినా… రోడ్డుపై ప్రమాదం జరిగినా… హత్య జరిగినా… పోలీసులు ముందుగా వెతికేది సీసీటీవీ ఫుటేజీలనే. ఎందుకంటే అబద్ధాలు మాట్లాడే మనుషుల కంటే… సీసీటీవీలు నిజాన్ని చెబుతాయి.
అందుకే నేడు గ్రామాల నుంచి మహానగరాల వరకు, దుకాణాల నుంచి ప్రభుత్వ కార్యాలయాల వరకు, పోలీస్ స్టేషన్ల నుంచి కోర్టుల వరకు సీసీటీవీలను ఏర్పాటు చేస్తున్నారు. నేరస్థులను పట్టుకోవడానికి, నిజాలను బయటపెట్టడానికి, నిర్దోషులకు న్యాయం చేయడానికి అవే కీలక ఆధారాలు.
అయితే… ఆ సాక్ష్యాలను కాపాడాల్సిన వ్యవస్థలే వాటిని మాయం చేయడం మొదలుపెడితే… అది కేవలం నిర్లక్ష్యం కాదు… ప్రజాస్వామ్యానికి ప్రమాద ఘంటిక.
సీసీటీవీ ఫుటేజీలు మాయం
సీసీటీవీ ఫుటేజీలు మాయం కావడం యాదృచ్ఛికమా… లేక నిజాలను దాచే ప్రయత్నమా?
2024 ఎన్నికల ఫలితాలపై రాష్ట్రవ్యాప్తంగా అనేక అనుమానాలు వ్యక్తమయ్యాయి. ప్రజలు ప్రశ్నలు అడిగారు. ఫిర్యాదులు చేశారు. కానీ ఆ ప్రశ్నలకు సమాధానాలు ఇవ్వాల్సిన సమయంలో సంబంధిత సీసీటీవీ ఫుటేజీలు అందుబాటులో లేకపోవడం దేశవ్యాప్తంగా చర్చకు దారితీసింది.
ఎన్నికలు అనేవి ప్రజాస్వామ్యానికి పునాది. అలాంటి ప్రక్రియలోనే సాక్ష్యాలు కనిపించకపోతే ప్రజల మనసుల్లో అనుమానాలు కలగడం సహజం. ఎందుకంటే ప్రజాస్వామ్యంలో అనుమానాలకు మందు పారదర్శకత మాత్రమే. సాక్ష్యాల మాయం కాదు.
సీసీటీవీ ఫుటేజీలు మాయం
లాకప్ డెత్ కేసులోనూ అదే కథ… ఇదేం యాదృచ్ఛికం?
తాజాగా ఒక లాకప్ డెత్ కేసులో దాదాపు నెల రోజుల సీసీటీవీ ఫుటేజీలు మాయం కావడం మరోసారి సమాజాన్ని కలవరపెడుతోంది.
పోలీస్ స్టేషన్ అంటే చట్టం నిలబడే ప్రదేశం. న్యాయం మొదలయ్యే ప్రదేశం. అక్కడే సాక్ష్యాలు అదృశ్యమైతే… ప్రజలు ఎవరిని నమ్మాలి?
ఒక సాధారణ పౌరుడి మొబైల్లో వీడియో డిలీట్ అయితే పోలీసులు అనుమానం వ్యక్తం చేస్తారు. కానీ పోలీస్ స్టేషన్లోనే సీసీటీవీ ఫుటేజీలు మాయం అయితే మాత్రం దాన్ని సాధారణ ఘటనగా చూడాలా?
ఇది కేవలం ఒక కేసు సమస్య కాదు. ఇది వ్యవస్థల విశ్వసనీయతకు సంబంధించిన అంశం.
సీసీటీవీ ఫుటేజీలు మాయం
“చట్టం అందరికీ సమానం” అన్న మాట ఇప్పుడు ప్రజలకు జోక్గా మారుతోంది
చట్టాన్ని అమలు చేయాల్సిన వ్యవస్థలే… చట్టానికి అవసరమైన సాక్ష్యాలను కాపాడలేకపోతే… లేదా అవి ఎందుకు మాయం అయ్యాయో ప్రజలకు జవాబు చెప్పలేకపోతే… న్యాయ వ్యవస్థపై ప్రజలకు ఎలా నమ్మకం కలుగుతుంది?
ఇప్పటికే ప్రజల్లో ఒక ప్రమాదకరమైన భావన పెరుగుతోంది. సామాన్యులకు ఒక చట్టం… అధికారులకు మరో చట్టం… వ్యవస్థలకు ఇంకో చట్టం అన్న అభిప్రాయం బలపడుతోంది.
ప్రజాస్వామ్య వ్యవస్థలకు ఇది అత్యంత ప్రమాదకరమైన సంకేతం.
సీసీటీవీ ఫుటేజీలు మాయం
సాక్ష్యాలే మాయం అయితే… న్యాయం ఎక్కడ వెతుక్కోవాలి..?
వ్యవస్థలను నిలబెట్టేది అధికారాలు కాదు… ప్రజల విశ్వాసం. ఆ విశ్వాసం ఒక్కసారి కూలిపోతే దాన్ని తిరిగి నిర్మించడం చాలా కష్టం.
సీసీటీవీ ఫుటేజీలు మాయం కావడం కంటే… వాటి మాయంపై వ్యవస్థలు మౌనం వహించడం మరింత ప్రమాదకరం.
కంచెనే చేను మేయడం మొదలుపెడితే… రైతు పంటను ఎవరూ కాపాడలేరు. అలాగే చట్టాన్ని కాపాడాల్సిన వ్యవస్థలే సాక్ష్యాలను మాయం చేయడం ప్రారంభిస్తే… ప్రజాస్వామ్యాన్ని ఎవరూ రక్షించలేరు.
అందుకే ఇప్పుడు ప్రజలు అడుగుతున్న ఒక్క ప్రశ్న…
“నిజాలను దాచడానికి సాక్ష్యాలను మాయం చేస్తున్నారా… లేక సాక్ష్యాలు మాయం అవుతున్నాయనే పేరుతో నిజాలనే సమాధి చేస్తున్నారా?”
