తెలంగాణ రాష్ట్ర ఆవిర్భావ సిద్ధాంతకర్తగా గుర్తింపు పొందిన ప్రొఫెసర్ కొత్తపల్లి జయశంకర్ స్మారకార్థం అమరావతిలో విగ్రహం ఏర్పాటు చేయాలని తెలంగాణ యంగ్ థింకర్స్ ఫోరమ్ ఆంధ్రప్రదేశ్ ప్రభుత్వాన్ని కోరింది. ఈ మేరకు ఫోరమ్ కన్వీనర్ రోహిత్ వక్రాల ముఖ్యమంత్రి నారా చంద్రబాబు నాయుడికి అధికారిక లేఖ పంపారు.
అమరావతిలో జయశంకర్ విగ్రహం
అమరావతిలో స్థలం కేటాయించాలని విజ్ఞప్తి
లేఖలో అమరావతి రాజధాని ప్రాంత అభివృద్ధి సంస్థ (సీఆర్డీఏ) పరిధిలో తగిన స్థలాన్ని కేటాయించి ప్రొఫెసర్ జయశంకర్ విగ్రహాన్ని ఏర్పాటు చేయాలని కోరారు. తెలంగాణ ఉద్యమానికి ఆయన చేసిన సేవలను గుర్తిస్తూ రెండు తెలుగు రాష్ట్రాల మధ్య స్నేహభావానికి ఇది ప్రతీకగా నిలుస్తుందని పేర్కొన్నారు.
జయశంకర్ సార్ సేవలను గుర్తుచేసిన ఫోరమ్
ప్రొఫెసర్ జయశంకర్ తన జీవితమంతా ప్రజాస్వామ్య విలువలు, సామాజిక న్యాయం, ప్రాంతీయ సమానత్వం కోసం కృషి చేశారని లేఖలో వివరించారు. తెలంగాణ రాష్ట్ర సాధనలో ఆయన పాత్ర చారిత్రాత్మకమని, ఆయన ఆలోచనలు రెండు రాష్ట్రాల ప్రజలకు స్ఫూర్తిదాయకమని అభిప్రాయపడ్డారు.
తెలుగు రాష్ట్రాల మధ్య సౌహార్దానికి ప్రతీకగా విగ్రహం
తెలంగాణ, ఆంధ్రప్రదేశ్ రాష్ట్రాలు ఒకే భాష, సంస్కృతి, చరిత్రతో అనుబంధం కలిగి ఉన్నాయని ఫోరమ్ పేర్కొంది. అమరావతిలో జయశంకర్ సార్ విగ్రహం ఏర్పాటు చేయడం ద్వారా పరస్పర గౌరవం, స్నేహం, సౌభ్రాతృత్వానికి ప్రతీకగా నిలుస్తుందని లేఖలో వెల్లడించింది.
ఇప్పుడు అందరి దృష్టి ఏపీ ప్రభుత్వ నిర్ణయంపైనే
హైదరాబాద్లో ఆంధ్ర ప్రాంత ప్రముఖుల విగ్రహాల ఏర్పాటు జరుగుతున్న ప్రస్తుత పరిస్థితుల్లో, అమరావతి రాజధాని ప్రాంతంలో జయశంకర్ సార్ విగ్రహం కోసం ఆంధ్రప్రదేశ్ ప్రభుత్వం స్థలం కేటాయిస్తుందా అనే అంశం చర్చనీయాంశంగా మారింది. ఈ విజ్ఞప్తిపై ప్రభుత్వం ఎలా స్పందిస్తుందో చూడాల్సి ఉంది.
జయశంకర్ సార్ విగ్రహంపై ఏపీ ప్రభుత్వం తీసుకునే నిర్ణయం తెలుగు రాష్ట్రాల మధ్య సంబంధాలపై కొత్త చర్చకు దారితీసే అవకాశముంది.
అమరావతిలో జయశంకర్ విగ్రహం
