ఆంధ్రప్రదేశ్ రాజకీయాల్లో జనాభా అంశం మరోసారి పెద్ద చర్చకు దారితీస్తోంది. “మూడో బిడ్డ పుడితే ₹30,000.. నాలుగో బిడ్డ పుడితే ₹40,000 ఇస్తాం” అనే ప్రకటన ఇప్పుడు సామాజిక, రాజకీయ, ఆర్థిక వర్గాల్లో తీవ్ర చర్చకు కారణమైంది. ఇప్పటికే పేదరికం, నిరుద్యోగం, వైద్య సేవల కొరత, విద్యా అసమానతలు వంటి సమస్యలు ప్రజలను వేధిస్తున్న సమయంలో జనాభా పెంపుపై ప్రోత్సాహకాలు ప్రకటించడం సరైన నిర్ణయమేనా అనే ప్రశ్నలు వినిపిస్తున్నాయి.
CBN Population Incentive Scheme Debate
ఇప్పటికే ఉన్న సమస్యలకు పరిష్కారం దొరికిందా?
రాష్ట్రంలో ఇప్పటికీ అనేక గ్రామాల్లో ప్రాథమిక సదుపాయాల కొరత కనిపిస్తూనే ఉంది. గిరిజన ప్రాంతాల్లో రోగులను డోలీలపై మోసుకెళ్తున్న ఘటనలు తరచూ వార్తల్లో నిలుస్తున్నాయి. గురుకుల హాస్టళ్లలో తాగునీరు, ఆహారం, వైద్య సదుపాయాల కొరతపై గతంలో అనేక ఆరోపణలు వచ్చాయి.
ఇలాంటి పరిస్థితుల్లో జనాభా పెంపుపై ప్రభుత్వం ప్రత్యేక దృష్టి పెట్టడం సరైందేనా అనే ప్రశ్నలు ప్రతిపక్షాలు మాత్రమే కాదు సామాన్య ప్రజల నుంచీ వినిపిస్తున్నాయి.
హామీలు.. ఆ తరువాత మౌనం..?
గతంలో ఇచ్చిన పలు హామీల అమలు విషయంలో కూడా ప్రభుత్వాలపై విమర్శలు వచ్చాయి. తాకట్టులో ఉన్న బంగారు ఆభరణాలు విడిపిస్తామని, డ్వాక్రా రుణాలు మాఫీ చేస్తామని ప్రకటించి తరువాత పూర్తి స్థాయిలో అమలు కాలేదని విమర్శలు వినిపించాయి.
ఇప్పుడు కొత్తగా జనాభా పెంపుపై నగదు ప్రోత్సాహకాలు ప్రకటించడంతో ప్రజల్లో మరోసారి అనుమానాలు మొదలయ్యాయి.
కుటుంబ నియంత్రణపై ఒత్తిడి ఆరోపణలు
పార్వతీపురం మన్యం జిల్లా గరుగుబిల్లి మండలంలో జరిగినట్లు చెబుతున్న ఒక సంఘటన ప్రస్తుతం సోషల్ మీడియాలో వైరల్ అవుతోంది. ఇద్దరు పిల్లల తర్వాత కుటుంబ నియంత్రణ ఆపరేషన్ చేయించుకోవడానికి వెళ్లిన ఒక పేద కుటుంబానికి “మూడో బిడ్డ కనండి” అంటూ ఒత్తిడి తెచ్చారనే ఆరోపణలు వినిపిస్తున్నాయి.
ఈ ఘటనపై అధికారిక స్పష్టత లేకపోయినా, జనాభా పెంపు చర్చల మధ్య ఇది మరింత వివాదాస్పదంగా మారింది.
జనాభా పెంపు వెనుక రాజకీయ లెక్కలున్నాయా?
కొంతమంది విశ్లేషకుల అభిప్రాయం ప్రకారం భవిష్యత్తులో చట్టసభల్లో సీట్ల పెంపు, నియోజకవర్గాల పునర్విభజన వంటి అంశాలను దృష్టిలో పెట్టుకుని జనాభా అంశాన్ని రాజకీయ చర్చలోకి తీసుకొస్తున్నారని అంటున్నారు.
“ఇప్పటికే ఉన్న జనాభాకు సరైన సదుపాయాలు కల్పించలేకపోతే.. మరింత జనాభా పెరిగితే పరిస్థితి ఎలా ఉంటుంది?” అనే ప్రశ్న ఇప్పుడు పెద్ద చర్చగా మారింది.
ప్రజలు అడుగుతున్న అసలు ప్రశ్న ఇదే
ప్రభుత్వం ప్రకటించే ₹30 వేలు, ₹40 వేలు కోసం కుటుంబాలు మరిన్ని పిల్లలను కనాలా? లేక ముందు విద్య, వైద్యం, ఉపాధి, జీవన ప్రమాణాలపై పూర్తి స్థాయిలో దృష్టి పెట్టాలా?
ఇదే ఇప్పుడు రాజకీయ, సామాజిక వర్గాల్లో ప్రధాన చర్చగా మారింది.
“హామీలతో జనాభా పెరుగుతుందా..? లేక ప్రజల సమస్యలే ఇంకా పెరుగుతాయా..?”
జనాభా పెంపుపై ఆర్థిక ప్రోత్సాహకాలు ప్రకటించడం ద్వారా ప్రభుత్వం కొత్త చర్చకు తెరలేపింది. అయితే ప్రజలు మాత్రం ముందుగా ప్రాథమిక సమస్యలకు పరిష్కారం కావాలని కోరుతున్నారు. విద్య, వైద్యం, ఉపాధి, జీవన ప్రమాణాలు మెరుగుపడకుండానే జనాభా పెంపు పిలుపు ఎంతవరకు సమంజసం అన్న ప్రశ్న ఇంకా సమాధానం కోసం ఎదురుచూస్తూనే ఉంది.
CBN Population Incentive Scheme Debate
