దేశంలో అత్యంత కీలకమైన వైద్య ప్రవేశ పరీక్షగా భావించే నీట్ యూజీ–2026 పునఃపరీక్షకు సంబంధించిన హాల్ టికెట్ల డౌన్లోడ్ ప్రక్రియ విద్యార్థులకు కొత్త పరీక్షగా మారింది. కేవలం కొన్ని నిమిషాల్లో పూర్తవాల్సిన ప్రక్రియ సాంకేతిక లోపాలు, వెబ్సైట్ సమస్యలతో రోజులు గడిచినా పూర్తి కాకపోవడంతో లక్షలాది మంది విద్యార్థులు, వారి తల్లిదండ్రులు తీవ్ర ఆందోళన వ్యక్తం చేస్తున్నారు. ఇప్పటికే పేపర్ లీక్ ఘటనతో విశ్వసనీయత కోల్పోయిన ఎన్టీఏ, ఇప్పుడు హాల్ టికెట్ల విషయంలోనూ అభ్యర్థులను తీవ్ర ఇబ్బందులకు గురిచేస్తోందనే విమర్శలు వెల్లువెత్తుతున్నాయి.
నీట్ హాల్ టికెట్ గందరగోళం
పేపర్ లీక్తో మొదలైన వివాదం.. మరోసారి గందరగోళం
పేపర్ లీక్ ఆరోపణల నేపథ్యంలో గత నెలలో నిర్వహించిన నీట్ పరీక్షను రద్దు చేసి, ఈ నెల 21న పునఃపరీక్ష నిర్వహించాలని ఎన్టీఏ నిర్ణయించింది. అయితే, పునఃపరీక్షకు సంబంధించిన హాల్ టికెట్లను ఈ నెల 14న విడుదల చేసినప్పటికీ, వాటిని డౌన్లోడ్ చేసుకోవడంలో అభ్యర్థులు తీవ్ర ఇబ్బందులు ఎదుర్కొంటున్నారు.
సర్వర్ సమస్యలు.. లాగిన్ కాక వెతలు
ఎన్టీఏ వెబ్సైట్లో వరుసగా సాంకేతిక సమస్యలు తలెత్తుతున్నాయని విద్యార్థులు ఆరోపిస్తున్నారు. కొందరికి వెబ్సైట్ ఓపెన్ కాకపోగా, మరికొందరికి లాగిన్ సమస్యలు ఎదురయ్యాయి. ఇంకొందరికి అడ్మిట్ కార్డు డౌన్లోడ్ కాకపోవడంతో గంటల తరబడి, రోజుల తరబడి ప్రయత్నాలు చేయాల్సి వస్తోందని అభ్యర్థులు వాపోతున్నారు.
23 లక్షల మందిలో 16 లక్షల మందికే హాల్ టికెట్లు
దేశవ్యాప్తంగా నీట్ పునఃపరీక్షకు సుమారు 23 లక్షల మంది అభ్యర్థులు హాజరుకానున్నారు. అయితే, హాల్ టికెట్లు విడుదలై నాలుగు రోజులు గడిచినా, బుధవారం రాత్రి వరకు కేవలం 16 లక్షల మంది మాత్రమే తమ అడ్మిట్ కార్డులను డౌన్లోడ్ చేసుకున్నారని ఎన్టీఏ ప్రకటించింది. అంటే ఇంకా లక్షలాది మంది విద్యార్థులు హాల్ టికెట్ల కోసం ఎదురుచూస్తూనే ఉన్నారు.
నీట్ హాల్ టికెట్ గందరగోళం
పరీక్ష తేదీ మాత్రం యథాతథం
హాల్ టికెట్ల డౌన్లోడ్లో తీవ్ర సమస్యలు ఉన్నప్పటికీ, పునఃపరీక్ష తేదీలో ఎలాంటి మార్పు లేదని ఎన్టీఏ స్పష్టం చేసింది. ఈ నెల 21న నిర్ణయించిన షెడ్యూల్ ప్రకారమే పరీక్ష నిర్వహిస్తామని ప్రకటించింది. దీంతో హాల్ టికెట్ కూడా అందని పరిస్థితిలో పరీక్షకు ఎలా సిద్ధం కావాలనే ఆందోళన విద్యార్థుల్లో నెలకొంది.
నీట్ హాల్ టికెట్ గందరగోళం
నీట్ నిర్వహణలో వరుస వైఫల్యాలు.. విద్యార్థుల భవిష్యత్తుతో చెలగాటమా?
పేపర్ లీక్తో ఇప్పటికే ప్రశ్నార్థకంగా మారిన నీట్ పరీక్ష నిర్వహణపై, ఇప్పుడు హాల్ టికెట్ల గందరగోళం మరింత అనుమానాలు రేకెత్తిస్తోంది. లక్షలాది మంది విద్యార్థుల భవిష్యత్తుతో ముడిపడి ఉన్న పరీక్ష నిర్వహణలో ఇలాంటి వైఫల్యాలు చోటుచేసుకోవడం ఎన్టీఏ పనితీరుపై తీవ్ర ప్రశ్నలు లేవనెత్తుతోంది. తక్షణమే సాంకేతిక సమస్యలను పరిష్కరించి, ప్రతి అభ్యర్థికి హాల్ టికెట్ అందేలా చర్యలు తీసుకోవాలని విద్యార్థులు, తల్లిదండ్రులు డిమాండ్ చేస్తున్నారు.
నీట్ హాల్ టికెట్ గందరగోళం
